Rev 6 | GbrGAW | STEP | Shi mi ɓei shi awye, ma gye kugyai lo hatimiyi kmisunyi ya. Wa ya takarda kmikmiyi leya, zaknayi n na awye-wyeyi da n gun anyi yi mi. Wa sa ewyi n begye yi wo ngye ogma wyisa, wa ci ge, “Ɓe.”

Revelation of John 6

Bewyegye Adokwo Nya

1 Shi mi ɓei shi awye, ma gye kugyai lo hatimiyi kmisunyi ya. Wa ya takarda kmikmiyi leya, zaknayi n na awye-wyeyi da n gun anyi yi mi. Wa sa ewyi n begye yi wo ngye ogma wyisa, wa ci ge, “Ɓe.”

2 Ma shi awye magye dokwo buyi gni n mi abye, okwo gunyi n taishi, n rawani yi wan n owo tukwo, wa gun wa gmiyalo, wo sun a kun, woi gyi nasara n akun yi mwa begye.

3 Nna vun wa lo hatimi bayi takarda kmi-kmiyi nya ya, wa lokwoya. Mawo wye-wyeyi da bayi woi cige, “Be.”

4 Nsa deye dokwo byei nu ɓei gmi ɓe. Aga kwo gunyi ebe yakwo n mwakpa, n ikoi wa bugbafu n na anyi la ya wa ɓe n bugba zhiyi, okun n azawuyi ɓa cepwo n na aba vinya. 5 Esa nwo ɓei la hatimi tayi ɓaya mawo wye-wyeyi da tayi woi ci ge “Be.” Ma gye Dokwo zhiyi, okwo gunyi n na anya mwiyai shi n owo akun. 6 Begye kwa gmi n na awyewyeyi dayi mi kwa ci ge, “Bredi sule gmanyi nu, mudu ngun ata barley nya sule gmanyi nu, amma olive emi n anab-nuwan yi to lon.”

7 She aɓei lo hatimi nyiyi ya, mawo wye-wyeyi da nyiyi woi gna, “Be.” 8 Nsa deye ma gye dokwo sawyi-sawyi yi, okwo gunyi eye efinu, n dokwo doi viwo n na avun ai yi ge Anapi a gaɓa ikwo tu n na anyi sopa ngun anyi wa wu n okunyi, n mikun yi, n nyasan yi n na anya fwanyai.

9 Shiwo ɓei lo hatimi tnuyi ya, ma gye bagadi, n kwo sinta magye awye-wyeyi azanya n na ɓei wu ɓa ntu Shekwoyi Ɓeda waʼazi zhin ɓo, ntu n oɓa gbenu ɓo dna n seida zhin. 10 Ɓai yi Dagayi n begye kalayi ɓai gna, “O Dagayi ikoda vinya, gyi-gyi-yi, gaiciya da, ho ɓei da anyi da owa n kni wyiyi nu, tu aɓo tukwo n ɓa ɓei zhin yi nyiʼa? Ho gba efi ami ta ga yi n kniwyi yiʼa, n na aza n ɓa fi n anyi nyiʼa?” 11 Aga zahozahoi n ɓami aje abui-bui, a gna ɓa ge, ɓa sun esa fyewyi, sai aku oɓa azaje wu n anyi, nɓa zhin Yesu afyenu nyi, ɓa ku ɓe da ɓa.

12 Ma shi awye shi wo lo hatimi tnanyi yi ya, ekni kwa shan-shan n mwa, nyipyeyi kwa dna wyegma zhiyi, ngye eje zhiyi, epya kwa wu n byei-byei ngye ami. 13 Nsai akpasu n eshe ɓawu ngye ɓa kaya n gye shi ese yakwo zhin kwa, ka gbayi tna ɓiyi ya nyi. 14 Eshe bmana kwa duya ngye a kmi pece, Epe doho-doho n na museyi vinya ɓa shan-shan ɓa cetala. 15 Asu vinya n na anyi, n na a tukwoda yi, n na anyabwayi, n na aza yakwoi n soja, n na azayi vinya, a yakwo n na aɓiyi, a fyenu n na dagayi, ɓa so ɓahin fi n na a kuta bmi n na ape bmi yi, 16 Ɓai ci bwi kpe ape ge ɓa wu ɓa, ɓai gyiwye ɓai ci ge, “Kaya kpe yi, fya soyi n oza awyeba nwo tu n esu-shinkpegye nyi, n kugya minagyi yi. 17 Ntuge nyipyeyi yakwo oɓa minagyi nya n la ɓe, nyikadonu ɓa pwo kwoʼa?”